नापोलीलाई १८ अंकको अग्रता

१४ फागुन, काठमाडौं । इटालियन सिरी ए को शीर्ष स्थानमा रहेको नापोलीले शनिबार राति एम्पोलीलाई २-० ले पराजित गरेको छ ।

यस जितपछि नापोलीले दोस्रो स्थानको इन्टरमाथि १८ अंकको फराकिलो अग्रता बनाउँदै उपाधि होड बलियो बनाएको छ ।

एम्पोलीका एड्रिन इस्माज्लीले १७औ मिनेटमा आत्मघाती गोल गरेपछि घरेलु मैदानमा नापोलीले अग्रता लिएको थियो ।

स्टार गोलस्कोरर भिक्टोर ओसिमहेनले २८औं मिनेटमा नापोलीका लागि गोल गरे । सिरी ए मा ओसिमहेनले लगातार आठौं खेलमा गोल गरेका हुन् । युभेन्ट्सका पूर्वखेलाडी क्रिस्टियानो रोनाल्डोले लगातार ११ खेलमा गोल गरेका थिए ।

ओसिमहेन १९ गोलसहित सिरी ए को सर्वाधिक गोलकर्ताको शीर्ष स्थानमा छन् ।

६७औं मिनेटमा मारियो रुईले रातो कार्ड पाएपछि नापोली १० खेलाडीमा समेटिएको थियो । तर त्यसले नापोलीलाई खेलको नतिजामा खासै असर गरेन ।

यस सिजन गज्जबको लयमा रहेको नापोलीले जितपछि २४ खेलबाट ६५ अंक जोडेको छ । एक खेल कम खेलेको इन्टरको ४७ अंक छ । आइतबार बोलोग्नलाई पराजित गरे इन्टरले अंकदूरी घटाउनेछ ।

from Online Khabar https://ift.tt/tomJ0Bn